103

اچھوت قوم

اّنج تے ہر بندہ آپنے آپ نوں تاریخ نال جڑیا سمجھدا اے تے ہمیشہ تاریخ دا حوالہ دیندا اے پر بدقسمتی نال تاریخ دی اک مستند تے غیر جانبدار شکل کوئی نہیں ہر بندہ آپنے زاوئیے نال تاریخ نوں سمجھدا تے ایہدی تشریح کردا اے۔ پاکستان دی تاریخ دا وی ایہو حال اے۔ کہیا ایہہ جاندا اے کہ پاکستان دو قومی نظریہ دی بنیاد تے بنیا۔ اک قوم ہندو سی تے دوجی مسلمان۔ ایس گل نوں بْھل کے کہ پاکستان بنن دے اصل محرکات کی سن جے دو قومی نظریہ نوں پاکستان بنن دی وجہ من لیا جاوے تے فر اصولی طور تے پاکستان دا ناں اسلامستان یا مسلم لینڈ ہو نا چاہیدا سی تے ایتھے انگریز دے دتے نظام دی تھاں کوئی غیر متنازعہ اسلامی نظام ہوندا تے سبھ قانون شریعتی ہوندے ۔ ایتھوں دے سبھ باشندے مسلمان کہلانے چاہیدے سن پر نا تے ایہہ اسلامستان یا مسلم لینڈبنیا تے نا ای ایتھے شریعتی قانون لاگو ہویا تے نا ای ایتھوں دے رہن والے مسلماں کہلائے۔ پاکستان دے بنن دے نال ای ایس ملک دے خالق تے بابے قائدِ اعظم نے آپنی پہلی تقریر وچ کہہ دتا سی کہ ایس ملک وچ کوئی مسلمان ، ہندو، سکھ عیسائی، بدھ نہیں اے بلکہ سبھ برابر نے تے پاکستانی نے تے ایتھے مْلا شاہی یا تھیو کریسی دا راج ہر گز نہیں ہووے گا۔ نال ای اوہنے پاکستانیاں توں بنگالی، سندھی، پنجابی، پٹھان، بلوچی، بروہی، کشمیری ہون دا حق وی کھوہ لیا۔

ایس طراں ایس ملک دی قوم مسلمان توں پاکستانی بن گئی تے ایس پاکستانی لئی مسلمان ہونا لازمی نہیں سی بلکہ اوہ کْجھ وی ہو سکدا سی ہندو، سکھ، بدھ، پارسی، عیسائی ، یہودی، کافر، ہور تے ہور ناستک وی ۔ ایس ملک وچ غیر مسلم لوکاں دی تعداد ودھن تے وی کوئی پابندی نہیں سی اوہ ایس ملک دی اکثریت وی بن سکدے سن۔

کْجھ لوکاں دے خیال وچ پاکستان دے باشندیاں نوں مسلمان توں پاکستانی بنائوں دی اک تے وجہ ایہہ سی کہ ایتھوں دیاں قدرتی قوماں جیویں بنگالی، سندھی، پنجابی، پٹھان، بلوچی، بروہی، کشمیری نوں مْکا کے اک اکلی قوم بنایا جاوے دوجی وجہ اسلام دے 73 فرقے سن یعنی ایتھے 73 قسم دا اسلام سی ایہناں وچوں کہیڑا صحیح تے کہیڑا غلط سی جو ایتھے لاگو کیتا جاندا۔

قائدِ اعظم خود شیعہ سی جے قائدِ اعظم ایتھے فقہ جعفریہ لاگو کردا تے باقی 72 فرقیاں ایس دے خلاف بغاوت کر دینی سی جے ایتھے غیر شیعہ شریعت لاگو ہوندی تے ایہنوں شیعاں تسلیم نہیں سی کرنا بلکہ قائدِ اعظم خود وی شیعہ ہوں دی وجہ توں غیر شیعہ شریعت نوں من کے خود آپنے مذہب چوں باہر کڈھیا جاندا سی۔

سب قوماں، مذہب فرقے مْکا کے اک نویں قوم پاکستانی تے بن گئی پر وچ اِک مسئلہ کھڑا ہو گیا بنگالیاں جو ایس ملک دی اکثریت سن اوہناں آپنے بنگالی ہون توں دستبردار ہون توں انکار کردتا۔ جے جمہوری اصولاں تے چلیا جاندا تے فر پاکستان دی قوم دا ناں پاکستانی نہیں بلکہ بنگالی ہوندا کیوں جے ایس قوم دی ایتھے اکثریت سی ۔ ایس طراں جے پاکستانی قوم مْکدی سی تے فر پاکستان دا ناں کیویں پاکستان رکھیا جا سکدا سی ۔ ایہدا ناں وی بنگال بنانا پیندا سی۔ ایس مسئلے چوں باہر نکلن لئی بنگالیاں نوں تے بنگالی بنن دا حق دے دتا گیا پر مغربی پاکستانیاں تے پاکستانیت دا شکنجہ کس دتا گیا۔ ایہہ صرف تے صرف پاکستانی سن پنجابی ، سندھی، پنجابی، پٹھان، بلوچی، بروہی، کشمیری نہیں سن۔

وقت دے بدلن نال مغربی پاکستان وچ وی قوم پرستی دیاں تحریکاں ایس اکیلی پاکستانی قوم دے خلاف بغاوت کردتی تے سندھی پختون بلوچ کشمیری بن گئے۔

ہْن پچھے ایہہ پاکستانی قوم سنگڑ کے پنجاب تک محدود رہ گئی اے ۔ باقی صوبیاں دے لوک آپنی قومی پہچان سندھی پختون بلوچ کشمیری دے طور تے کراندے نے۔ ایس بچی کھچی پاکستانی قوم وچوں اگوں دو شاخاں بنیاں نے پنجابی پاکستانی شاخ تے پاکستان توں باہر رہندے پاکستانی۔ ایہناں باہر رہندے پاکستانیاں وچ سندھی پٹھان بلوچی بروہی کشمیری بھانویں سو واری کہے کہ اوہ پاکستانی نہیں بلکہ سندھی، پٹھان، بلوچی، بروہی، کشمیری اے پر کوئی نہیں مندا کیوں جے پاکستان توں باہر رہندے پاکستانیاں وچ وڈی اکثریت پنجابیاں دی اے جو خود نوں پنجابی نہیں بلکہ پاکستانی کہندے نے ایس طراں ایہہ سندھی، پٹھان، بلوچی، بروہی، کشمیری وی پاکستانی بنا دتے گئے نے۔ پاکستان وچ رہندے پاکستانیاں تے باہر رہندے پاکستانیاں وچ اک واضح فرق اچھوت تے غیر اچھوت دا اے ۔ پاکستان وچ رہندا پاکستانی” برہمن” اے تے باہر رہندا پاکستا نی اچھوت اے۔

اِک زمانے وچ باہر رہندا پاکستانی ہیرو تے آئیڈیل ہوندا سی لوکی اوہنوں ولائتیا کہندے سن جد اوہ پاکستان آئوندا سی تے لوکی اوہنوں دیکھن جاندے سن۔ اج ایہہ ہیرو اچھوت بن گیا اے۔ ایہہ غیر ملک وچ مقامی لوکاں دی نسل پرستی دا شکار ہوندا ۔ دھیلا دھیلا کمائون لئی غلاماں طراں رج کے رگڑا کھاندا اے۔ آپنی مِٹی دا وچھوڑا کٹدا اے۔

پاکستان وچ کاغذاں وچ ایہنوں کدے پاکستانی بنیا جاندا اے تے کدے نہیں ایس دا غیر ملک وچ قیام( جہنوں اقامہ وی کہیا جاندا ے) ایس نوں آئینی طور تے وی اچھوت یا دوجے درجے دا پاکستانی بنا دیندا اےتے ایس نوں اوہ سارے حقوق نہیں دیندا جو پاکستان وچ رہندے پاکستانی نوں حاصل نے ۔ ایہناں حقوق وچ ایس اچھوت پاکستانی دی جان مال دے تحفظ دی ضمانت وی شامل اے۔ بظاہر غیر ملکی پاکستانیاں دی جان مال دے تحفظ لئی قانون وی نے تے اک وزار ت وی موجود اے پر عملی طور سبھ کْجھ ایہدے اْلٹ اے۔ نا ایہدا کوئی نمائندا نا کوئی لیڈر ۔ ایس دے نام نہاد تحفظ دا اک میدان ایہناں اچھوتاں دے مال دا تحفظ اے۔

پاکستان وچ قبضہ مافیا دا سبھ توں وڈا نشانہ ایہو اچھوت پاکستانی اے۔ جد ایہدی جائداد تے قبضہ ہو جاندا اے تے ایہہ بے بس ہوندا اے۔ قانون دی مدد لگ بھگ نا ممکن ہوندی اے۔ جے ایہہ پولیس کول جاندا یا عدالتاں دا بوہا کھڑکاندا اے تے ایہہ اک جال وچ پھس جاندا اے۔ ہر پاسے قانونی ادارے منہ اڈ کے بیٹھے ہوندے نے ایس وچارے دا رشوت دے دے کے دھوں نکل جاندا اے۔ عدالتاں وچ ایہدی فریاد سْنن لئی دیوانی یا سول قانون لاگو ہوندا اے جس راہیں عملی طور تے ایس نوں تاریخاں بھگتن لئی گھٹو گھٹ 5 توں لے کے 50 سال دا عرصہ چاہیدا ے۔ اِنج ایہہ قبضیاں دا شکار وچارے غیر ملک وچ اپنا گھر باہر نوکری کاروبار تے بیوی بچے چھڈ کے پاکستان ایہنے سال پھسے بیٹھے ہوندے نے۔
میرے اک دوست دی لاہور وچ جائیداد اے ایس تے قبضہ ہوگیا ایہہ قبضہ چھڈوان لئی واپس گیا ۔ قانون دی مدد منگی تے ہر تھاں” دیو دیو” دی پکار جے نا دیو تے کوئی گل ای نہیں سْندا ایہہ پورا سال ایتھے بیٹھا رہیا سویڈن وچ ایہدی نوکری گئی ایس توں وکھ ایہنوں لکھاں روپیاں دا ہور نقصان ہویا مجبور ہو کے ایہنے قانونی چارہ جوئی دے ہتھیار سْٹ دتے تے رشوت دین دا سہارا لیا ایہہ پنجاہ لکھ روپیہ رشوت دی بھینٹ چڑھا کے اپنی جائداد واپس لے سکیا۔ ایہہ کوئی اکلا پاکستانی نہیں سی بلکہ لگ بھگ ہر اچھوت پاکستانی ایس دا شکار ہویا اے۔ ایس توں علاوہ ایس کول کوئی سیاسی حق نہیں اے ۔ نا ایہہ کوئی الیکشن لڑ سکدا اے تے نا ای سینٹ دا ممبر ہو سکدا اے۔ پاکستان دے ہور محکمیاں وچ وی ایہدی کوئی نمائندگی نہیں۔ یورپ تے ہور تہذیب یافتہ ملکاں دے ملک توں باہر رہندے شہریاں نوں ملک وچ رہندے شہریاں دے برابر سمجھیا جاندا اے تے ایہناں دے حقوق دی ضمانت ایہناں دے آئین تے قانون اصولی طور تے اتےعملی طور تے دیندےنے پر پاکستا ن وچ ایہناں باہر رہندے پاکستانیاں نوں شکار، سامی تے شہری حقوق توں محرو م سمجھیا جاندا اے۔

ایس اچھوت پاکستانی دی داد فریاد سنن لئی پاکستان دی عدلیہ، مقننہ، انتظامیہ، میڈیا، مذہبی ادارے بلکہ این جی او بہرے ہو چکے نے ۔ ایہناں اچھوت پاکستانیاں وچ لگ بھگ نوے فیصد گنتی پنجابیاں دی اے۔ ایس پاکستانی بارے ایہہ وی کہیا جاندا اے کہ ایہہ کروڑاں پاکستانیاں دا پالن ہار اے کہندےنے:” اج جِس گھر دا کوئی جی باہر گیا ہویا اے ایس گھر وچ ای روٹی پکدی اے”

تْسیں آپے دسو ایہہ پاکستانی اچھوت نہیں تے ہور کی اے۔ ایس اچھوت دا کون والی وارث اے

p.p1 {margin: 0.0px 0.0px 0.0px 0.0px; font: 12.0px ‘Helvetica Neue’; color: #454545; min-height: 14.0px}
p.p2 {margin: 0.0px 0.0px 0.0px 0.0px; text-align: right; font: 12.0px ‘.Noto Nastaliq Urdu UI’; color: #454545}
span.s1 {font: 12.0px ‘Helvetica Neue’}

اس خبر پر اپنی رائے کا اظہار کریں

اپنا تبصرہ بھیجیں