چھ مئی 2025 کی رات بھارت نے “آپریشن سندور” کے تحت پاکستان اور پاکستان کے زیر انتظام کشمیر میں متعدد مقامات پر میزائل اور فضائی حملے کیے۔ بھارتی وزارت دفاع کے مطابق، “آپریشن سندور” کا مقصد دہشت گرد تنظیموں جیسے لشکرِ طیبہ اور جیشِ محمد کے کیمپوں اور بنیادی ڈھانچے کو نشانہ بنانا تھا۔ حملے میں نو مقامات کو نشانہ بنایا گیا، جن میں بہاولپور، مریڈکے، مظفرآباد، کوٹلی، سیالکوٹ اور بھمبر شامل ہیں۔ بھارت نے دعویٰ کیا کہ حملوں میں صرف دہشت گردی سے متعلقہ تنصیبات کو نشانہ بنایا گیا اور پاکستانی فوجی تنصیبات کو نقصان نہیں پہنچایا گیا۔
پاکستان نے بھارتی حملوں کو “بزدلانہ اقدام” قرار دیتے ہوئے شدید مذمت کی۔ پاکستانی حکام کے مطابق، حملوں میں کم از کم نو شہری ہلاک اور 38 زخمی ہوئے، جن میں ایک بچہ بھی شامل ہے۔ پاکستانی فوج نے جوابی کارروائی میں بھارتی فضائیہ کے پانچ طیارے مار گرانے کا دعویٰ کیا، جبکہ بھارت نے ان دعوؤں کی تصدیق نہیں کی۔
دونوں ممالک کے درمیان کشیدگی میں اضافہ ہوا ہے، اور لائن آف کنٹرول پر فائرنگ کے تبادلے جاری ہیں۔ بھارت نے 7 مئی کو ملک بھر میں “آپریشن ابھیاس” کے تحت شہری دفاعی مشقیں شروع کیں، جو 1971 کے بعد سب سے بڑی مشقیں ہیں۔ ان مشقوں میں بلیک آؤٹ، ایئر ریڈ سائرن اور انخلاء کی مشقیں شامل ہیں۔
پاکستانی فوج کے ترجمان کے مطابق 6 اور 7 مئی کی درمیانی شب انڈیا نے پاکستان اور اس کے زیر انتظام کشمیر میں چھ مختلف مقامات کو نشانہ بنایا جس میں 26 شہری ہلاک جبکہ 46 زخمی ہوئے ہیں۔ پاکستانی فوج کے ترجمان لیفٹیننٹ جنرل احمد شریف چوہدری کے مطابق اِن اموات کی تفصیلات کچھ اس طرح ہیں۔
صوبہ پنجاب کے شہر احمد پور شرقیہ میں مسجد سبحان اللہ کو نشانہ بنایا گیا جس کے نتیجے میں 13 افراد مارے گئے ہیں۔ مرنے والوں میں تین برس کی دو بچیاں، سات خواتین اور چار مرد شامل ہیں۔ اس واقعے میں 37 افراد زخمی ہوئے ہیں، جن میں نو خواتین اور 28 مرد ہیں۔
پاکستان کے زیر انتظام کشمیر کے شہر مظفر آباد کے قریب واقع مسجد بلال کو نشانہ بنایا گیا جس کے نتیجے میں تین اموات ہوئیں جبکہ ایک بچی اور ایک لڑکا زخمی ہیں۔
پاکستان کے زیر انتظام کشمیر کے شہر کوٹلی میں مسجد عباس کو نشانہ بنایا گیا، جس سے 16 سال کی لڑکی اور 18 سال کا لڑکا ہلاک ہوئے۔ اس حملے کے نتیجے میں ایک ماں اور بیٹی زخمی ہوئے ہیں۔
صوبہ پنجاب کے شہر مریدکے میں مسجد ام القرہ کو نشانہ بنایا گیا، جہاں تین مرد ہلاک ہوئے جبکہ ایک زخمی ہے۔
پنجاب کے شہروں سیالکوٹ اور شکر گڑھ میں ہونے والے حملوں کے نتیجے میں کسی جانی نقصان کی اطلاعات موصول نہیں ہوئی ہیں۔
پاکستانی فوج کے ترجمان کے مطابق اسی دورانیے میں لائن آف کنٹرول پر انڈیا کی جانب سے بلااشتعال فائرنگ کے نتیجے میں پانچ شہری ہلاک ہوئے ہیں، جن میں پانچ سال کا ایک بچہ بھی شامل ہے۔
